விஜய் தேவரகொண்டாவும் சமந்தாவும் காதலுடன் கைகோர்த்த ‘குஷி’ படத்தின் போஸ்டர்! ரிலீஸ் தேதியோடு வெளியீடு.

விஜய் தேவரகொண்டா கதையின் நாயகனாக நடித்திருக்கும் ‘குஷி’ படத்தின் வெளியீட்டு தேதியை அறிவித்து போஸ்டரை வெளியிட்டிருக்கிறார்கள். போஸ்டரில் விஜய் தேவரகொண்டாவும் நடிகை சமந்தாவும் காதலுடன் கைகோர்த்துக்கொண்டு தோன்றுவது ரசிகர்களின் கவனத்தை வெகுவாக ஈர்த்திருக்கிறது.

தெலுங்கு திரையுலகின் முன்னணி நட்சத்திர இயக்குநரான சிவ நிர்வானா இயக்கத்தில் தயாராகும் இந்த படத்தில் விஜய் தேவரகொண்டாவுக்கு ஜோடியாக சமந்தா நடித்திருக்கிறார். இவர்களுடன் ஜெயராம், சச்சின் கடேகர், முரளி சர்மா, லக்ஷ்மி, அலி, ரோகிணி, வெண்ணிலா கிஷோர், ராகுல் ராமகிருஷ்ணா, ஸ்ரீகாந்த் ஐயங்கார், சரண்யா உள்ளிட்ட பலர் நடித்திருக்கிறார்கள்.

இந்த படத்தின் இறுதிகட்ட படப்பிடிப்பு தற்போது விறுவிறுப்பாக நடைபெற்று வருகிறது. விஜய் தேவரகொண்டா – சமந்தா ஜோடியின் நட்சத்திர மதிப்பிற்கு ரசிகர்களிடையே வரவேற்பும், எதிர்பார்ப்பும் உள்ளது.

காதலை மையப்படுத்திய இந்த படத்தை மைத்ரி மூவி மேக்கர்ஸ் பிரமாண்டமான பொருட்செலவில் தயாரித்திருக்கிறது. படம் வரும் செப்டம்பர் மாதம் 1-ம் தேதி பல மொழிகளில் வெளியாகிறது.