சம்ஜாத் பி.எஸ். இயக்கத்தில் உருவான ‘ஹாஃப்’ (HALF) திரைப்படம், புகழ்பெற்ற டொராண்டோ சர்வதேச திரைப்பட விழாவின் (TIFF) மதிப்புமிக்க ‘மிட்நைட் மேட்னஸ்’ (Midnight Madness) பிரிவில் திரையிடப்பட்டு மலையாள சினிமா வரலாற்றில் புதிய சாதனையை படைத்துள்ளது. இந்த பிரிவில் தேர்வாகி திரையிடப்பட்ட முதல் மலையாள திரைப்படம் என்ற பெருமையை ‘ஹாஃப்’ பெற்றுள்ளது. திரையரங்கில் படம் திரையிடப்பட்ட தருணம் முதல், அதை தொடர்ந்து நடந்த கலந்துரையாடல் (Q&A) வரை பார்வையாளர்களின் உற்சாகமான கரகோஷங்களால் அரங்கம் அதிர்ந்தது.
‘ஃபிராக்ரண்ட் நேச்சர் ஃபிலிம் கிரியேஷன்ஸ்’ (Fragrant Nature Film Creations) பேனரில் ஆன் சஜீவ் மற்றும் பி.கே. சஜீவ் இணைந்து தயாரித்துள்ள இத்திரைப்படம், தீவிரமான கதைக்களம் மற்றும் வழக்கத்திற்கு மாறான காட்சி அமைப்பினால் சர்வதேச பார்வையாளர்களை பெரிதும் கவர்ந்தது. படத்தின் பல பரபரப்பான தருணங்களில் திரையரங்கம் முழுவதும் கைதட்டல்கள் பறந்தன.
திரையிடலுக்கு பிறகு நடைபெற்ற கேள்வி-பதில் அமர்வில், இயக்குநர் சம்ஜாத், தயாரிப்பாளர்கள் ஆன் சஜீவ் & பி.கே. சஜீவ், முதன்மை நடிகர்கள் ரஞ்சித் சஜீவ் & ஐஸ்வர்யா ராஜ், இசையமைப்பாளர் மிதுன் முகுந்தன் மற்றும் ஒலி வடிவமைப்பாளர் விஷ்ணு கோவிந்த் ஆகியோர் கலந்துகொண்டனர்.
படத்தின் கருப்பொருள், மேக்கிங், காட்சி மொழி, இசை, ஒலி வடிவமைப்பு மற்றும் நடிகர்களின் நடிப்பு குறித்து பார்வையாளர்களுடன் படக்குழுவினர் சுவாரஸ்யமாக உரையாடினர்.
முக்கிய சிறப்பம்சங்கள்:
சண்டைக் காட்சிகள்: வெரி ட்ரை யூலிஸ்மேன் (Very Tri Yulisman) அமைத்த ஆக்ஷன் பயிற்சிகள் பார்வையாளர்களிடையே பெரும் பாராட்டை பெற்றன.
தொழில்நுட்ப நேர்த்தி: பப்பீனு-வின் (Pappinu) ஒளிப்பதிவு, மகேஷ் புவனெந்தின் (Mahesh Bhuvanend) படத்தொகுப்பு, மிதுன் முகுந்தனின் இசை மற்றும் விஷ்ணு கோவிந்தின் ஒலி வடிவமைப்பு ஆகியவை படத்தின் விறுவிறுப்பை உச்சத்திற்கு கொண்டு சென்றுள்ளன.
நடிப்பு: முதன்மை கதாபாத்திரங்களில் நடித்த ரஞ்சித் சஜீவ் மற்றும் ஐஸ்வர்யா ராஜ் ஆகியோரின் நுட்பமான நடிப்பு உலகளாவிய பார்வையாளர்களின் கவனத்தை ஈர்த்துள்ளது.
இத்திரைப்படத்தை வடஇந்தியாவில் எக்செல் என்டர்டெயின்மென்ட் மற்றும் ஏ.ஏ. .ஃபிலிம்ஸ் இணைந்து வழங்குகின்றன. படத்தின் சர்வதேச விற்பனை உரிமையை ஐரோப்பிய நிறுவனமான ‘பெஸ்ட் ஃபிரண்ட் ஃபோரெவர்’ கைப்பற்றியுள்ளது.
டொராண்டோ சர்வதேச திரைப்பட விழாவில் கிடைத்துள்ள இந்த வரலாற்று சிறப்புமிக்க வரவேற்பின் மூலம், ‘ஹாஃப்’ திரைப்படம் உலகளாவிய திரைப்பட சந்தையில் மலையாள சினிமாவிற்கு ஒரு புதிய அடையாளத்தையும் அங்கீகாரத்தையும் பெற்று தந்துள்ளது.
