விகாஸ் கதாநாயகனாக நடிக்க, நகைக்கடை கொள்ளை பின்னணியில் உருவாகவிருக்கும் படம் துச்சாதனன். இந்த படத்தின் துவக்கவிழா (12.2. 2023 / ஞாயிறு) சென்னையில் நடந்தது.
விழாவில் பத்திரிகையாளர்களிடம் பேசிய படத்தின் இயக்குநர் தளபதி, ”படத்தின் ஆரம்ப காட்சியில் நகைக்கடையொன்றில் திருட்டு நடக்கிறது. அதை யார் செய்தார்கள் என்பதை கண்டுபிடிக்க காவல்துறை களமிறங்குகிறது. அதன் பின்னர் நடக்கும் சுவாரஸ்யமான திருப்பங்களே படத்தின் கதை.
பாஞ்சாலியின் துகிலை உரித்தவன் மட்டும் துச்சாதனன் இல்லை. மற்றவர்களுக்கு ஏற்படும் அவமானம், இழப்பு போன்ற எதையும் சிந்திக்காமல் தன் சுயநலத்துக்காக மற்றவர்களின் உடைமை, உரிமை, உயிர் போன்றவற்றை உரியும் அனைவரும் துச்சாதனன் தான். இதுதான் படத்தின் தலைப்புக்கான காரணம்” என்றார்.
கதாநாயகியாக புதுமுகம் சாய் ரோகிணி நடிக்க,‘லொள்ளு சபா’ மனோகர், மில்டன் மேடிசன், பிரபு சாஸ்திரி, வேளாங்கண்ணி, அருண் விக்னேஷ், விக்னேஷ் வி.எஸ்., சரவணன் ஆகியோர் முக்கிய கதாபாத்திரங்களில் நடிக்கவுள்ளனர்.
இவர்களுடன் முன்னணி நடிகர், நடிகைகளும் நடிக்கவிருக்கிறார்கள்.
படத்தில் மூன்று பாடல்களும் இரண்டு சண்டைக் காட்சிகளும் இடம் பெறுகின்றன. படப்பிடிப்பு சத்யமங்கலம் பகுதியில் நடக்கிறது.
‘தாய் திரையரங்கம்’ சார்பில், எஸ்.அருண் விக்னேஷ், ஆர்.வேல்முருகன் இருவரும் இணைந்து இந்த படத்தை தயாரிக்கிறார்கள்.
நாயகன் விகாஸ், ‘அகிலா’, ‘என் சங்கத்து ஆள அடிச்சவன் எவன்டா’, ‘ஒற்றாடல்’ போன்ற உள்ளிட்டபடங்களில் நடித்துள்ளார்.
படக்குழு:
ஒளிப்பதிவு – பி.வி.பால முருகன்
இசை – விஜய் பிரபு
எடிட்டிங் – வி.எஸ்.விக்னேஷ்
சண்டைப் பயிற்சி – ராக்கி ராஜேஷ்
மக்கள் தொடர்பு – கோவிந்தராஜ்
