தொடர்ந்து வெற்றிப் படங்களைத் தயாரித்து வருகிற ‘சத்யஜோதி ஃபிலிம்ஸ்’ நிறுவனம் விஷ்ணு விஷால் நடிப்பில் புதிய படமொன்றை தயாரிக்கவிருக்கிறது.
விமர்சனங்களில் பெரிதும் பாராட்டப்பட்ட, வசூல் ரீதியாக பெரியளவில் வெற்றி பெற்ற ‘முண்டாசுப்பட்டி’, ‘ராட்சசன்’ படங்களை இயக்கிய ராம்குமார் இந்த படத்தை இயக்குகிறார். இந்த படங்களில் ஹீரோவாக நடித்திருந்த விஷ்ணு விஷால் மீண்டும் ராம்குமார் இயக்கத்தில் நடிக்கவுள்ளார்.இயக்குநர் ராம்குமார் திரையில் தனித்துவமான உள்ளடக்கத்துடன் கூடிய திரைக்கதைகளைப் படைத்து வெற்றி பெற்றுள்ளார். அவரது முதல் இயக்கமான ‘முண்டாசுப்பட்டி’ நகைச்சுவை திரைப்படமாக இருந்தபோதிலும், அவர் தனது இரண்டாவது திரைப்படமான ‘ராட்சசன்’ மூலம் அனைவரையும் ஆச்சரியப்படுத்தினார், அப்படம் இதயத்தை அதிரச்செய்யும் உளவியல் திரில்லராக அசத்தியது.
விஷ்ணு விஷால் ‘எஃப்ஐஆர்’, ‘கட்டா குஸ்தி’ என தொடர்ந்து ஹிட் கொடுத்துக் கொண்டிருக்கிறார்.
அந்த வகையில் வெற்றிப்பட தயாரிப்பாளர், வெற்றிப்பட இயக்குநர், வெற்றிப்பட நாயகன் என மூன்று தரப்பும் ஒரே புள்ளியில் இணைவதால் படம் குறித்த எதிர்பார்ப்பு அதிகரித்துள்ளது.இன்னும் பெயரிடப்படாத இந்த படம், பெரிய பட்ஜெட்டில் நகைச்சுவையுடன் கூடிய காதல் கதையை ஃபேண்டஸி கலந்து சொல்லும் படமாக இருக்கும் என்கிறது படக்குழு.
படத்தின் படப்பிடிப்பு, நடிகர்கள் மற்றும் தொழில்நுட்பக் குழுவினர் பற்றிய அறிவிப்பு விரைவில் தெரியவரும்.
20-க்கும் மேற்பட்ட மாநில அரசு விருதுகள், நான்கு தேசிய விருதுகள் பெற்ற படங்களை தயாரித்துள்ள சத்ய ஜோதி ஃபிலிம்ஸ் இப்போது, ‘மரகத நாணயம்’ படத்தை இயக்கிய ஏ.ஆர்.கே.சரவணன் இயக்கத்தில், ஹிப்ஹாப் தமிழாவின் ‘வீரன்’ படத்தை தயாரிக்கிறது.
மட்டுமல்லாது தென்னிந்தியாவின் மிகப்பெரிய எதிர்பார்ப்புக்குரிய படங்களில் ஒன்றான ‘கேப்டன் மில்லர்’ உள்ளிட்ட நம்பிக்கைக்குரிய படங்களையும் தயாரிக்கிறது.
‘கேப்டன் மில்லர்’ படத்தின் படப்பிடிப்பு விறுவிறுப்பாக நடைபெற்று வருகிறது. இந்த படத்தில், தேசிய விருது பெற்ற நடிகர் தனுஷ், கன்னட சூப்பர் ஸ்டார் டாக்டர் சிவ ராஜ்குமார், தெலுங்கு திரையுலகின் முன்னணி நடிகர் சந்தீப் கிஷன், நடிகை பிரியங்கா அருள் மோகன் மற்றும் பல பிரபல நட்சத்திரங்கள் நடிக்கின்றனர்.
