சினிமா மீது காதல் கொண்ட ராஜசேகர், யுவராஜ் கண்ணன் இருவரும் இணைந்து ‘லாக்கர்’ என்கிற படத்தை இயக்கியிருக்கிறார்கள்.
இரட்டை இயக்குநர்களில் கிருஷ்ணன் – பஞ்சு தமிழ்த் திரையுலகில் பிரபலமானவர்கள். அதன் பிறகு பாரதி – வாசு, ராபர்ட் – ராஜசேகர், மலையாள சித்திக் – லால் உள்ளிட்ட இரட்டை இயக்குநர்கள் ரொம்பவே ஃபேமஸ். அந்த வகையில் நீண்ட இடைவெளிக்குப் பின் தமிழில் இரட்டை இயக்குநர்களாக களம் காண்கிறார்கள். 
ராபரி டிராமாவாக உருவாகியுள்ள லாக்கர் படத்தில் கதாநாயகனாக விக்னேஷ் சண்முகம் நடித்துள்ளார். இவர் ஏற்கெனவே ‘இறுதிப்பக்கம்’ என்ற படத்தின் மூலம் அறிமுகமானவர். ‘எதற்கும் துணிந்தவன்’, ‘கேம் ஓவர்’ உள்ளிட்ட படங்களில் எதிர்மறைப் பாத்திரங்களிலும் மாஸ்டர்’‘ படத்தில் குணச்சித்திர வேடத்திலும் நடித்திருக்கிறார். ‘கள்ளச்சிரிப்பு’ என்ற ஜீ5 ஓடிடி தளத்தின் இணைய தொடரிலும் நடித்துள்ளார்.
கதாநாயகியாக அறிமுக நடிகை நிரஞ்சனி அசோகன் நடித்துள்ளார். இவர் சில பைலட் படங்களிலும் ஆல்பங்களிலும் நடித்திருக்கிறார்.
வில்லனாக நிவாஸ் ஆதித்தன் நடித்துள்ளார். இவர் ‘தரமணி’, ‘ரெஜினா’ உள்ளிட்ட படங்களில் நடித்தவர். ‘பிரின்ஸ்’, ‘மிரள்’, ‘குட் நைட்’ உள்ளிட்ட படங்களில் நடித்த சுப்ரமணியன் மாதவன் முக்கிய கதாப்பாத்திரத்தில் நடித்துள்ளார்.
படத்தில் மூன்று பாடல்கள் இடம் பெற்றுள்ளன. கார்த்திக் நேத்தா,விஷ்ணு இடவன் என இரு பாடலாசிரியர்கள் எழுதி உள்ளனர்.
முழுக்க முழுக்க சென்னை, அதைச் சுற்றியுள்ள பகுதிகளில் படப்பிடிப்பு நடைபெற்றுள்ளது. கிழக்கு கடற்கரைச் சாலை, அம்பத்தூர், குரோம்பேட்டை உள்ளிட்ட இடங்களில் 30 நாட்கள் படப்பிடிப்பு நடைபெற்றுள்ளது. படப்பிடிப்பு முடிந்து இறுதி கட்டப் பணிகள் நடந்து வருகிறது. படம் விரைவில் திரைக்கு வரவுள்ளது.
இப்படத்திற்கு தணிகைதாசன் ஒளிப்பதிவு செய்துள்ளார். இவர் தரமணி எம்.ஜி.ஆர் திரைப்படக் கல்லூரி மாணவர்.களப்பணி அனுபவத்திற்காக ஓம் பிரகாஷ் மற்றும் பல்லு போன்ற ஒளிப்பதிவாளர்களிடம் பணியாற்றியவர். ஸ்டார் ஸ்போர்ட்ஸ் போன்ற சேனல்களுக்கு ஒளிப்பதிவு செய்து கொடுத்துள்ளவர்.நிறைய விளம்பரப் படங்கள், கார்ப்பரேட் வீடியோக்கள் எடுத்துள்ளவர்.இவர் டெல்டா என்கிற இன்னொரு படத்திலும் ஒளிப்பதிவுப் பணி செய்து வருகிறார்.
அறிமுக இசையமைப்பாளர் வைகுந்த் ஸ்ரீநிவாசன் இசையமைத்துள்ளார்.இவர் ஏற்கெனவே நடிகர் தளபதி விஜய் பிறந்தநாளை முன்னிட்டு அண்ணன் வேற மாதிரி என்ற பாடல் இசை அமைத்தவர். ஏராளமான இசை ஆல்பங்களுக்கும், மை டியர் எக்ஸ் இணையத் தொடருக்கும் இசையமைத்துள்ளவர்.
படத்தொகுப்பு ஸ்ரீகாந்த் கண பார்த்தி.இவர் பென்குயின், குருதி ஆட்டம் போன்ற படங்களில் உதவியாளராகப் பணியாற்றியவர். இப்படிப் பல்வேறு திறமையாளர்கள் பணி புரிந்துள்ளனர்.
