ஸ்ரேயா சரண் நடிப்பில், இசைஞானி இளையராஜாவின் இசையில் உருவாகும் பன்மொழித் திரைப்படம் ‘மியூசிக் ஸ்கூல்.’ இந்த படம் வரும் மே 12-ம் தேதி வெளியாகிறது. 
அதையொட்டி, படத்தின் இயக்குநர் பாப்பாராவ் பிய்யாலாவும் நடிகை ஸ்ரேயாவும் இன்று சென்னையில் இளையராஜாவை சந்தித்தனர். உரையாடி, புகைப்படங்கள் எடுத்துக் கொண்டனர்.
இந்த படம் முழுக்க முழுக்க இசையை மையமாகக் கொண்டு, இளம் மாணவர்கள் எதிர்கொள்ளும் தற்போதைய கல்வி அழுத்தத்தையும், பள்ளி குழந்தைகளின் ஒட்டுமொத்த வளர்ச்சியின் முக்கியத்துவத்தையும் வலியுறுத்தும் வகையில் உருவாக்கப்பட்டுள்ளது. கல்விச் சாதனைகள் மட்டுமே முக்கியமில்லை, கல்வியல்லாத மற்ற செயல்பாடுகளும் என்பதை வலியுறுத்தும் இத்திரைப்படம், பொழுதுபோக்கு முறையில் இசைஞானியின் இசைக்கோர்ப்பில், 11 பாடல்களால் அழகாக விவரிக்கிறது. அவற்றில் மூன்று பாடல்கள் இந்திய ரசிகர்களைக் கவரும் வகையில், கிளாசிகல் மியூசிக் முறையில் உருவாகியுள்ளது.
படம் வெளியாவதையொட்டி, படக்குழு முன்வெளியீட்டு பணிகளில் தீவிரமாக ஈடுபட்டுள்ளது. இந்நிலையில் இன்றைய சந்திப்பு நடந்தது.
படத்தில் முன்னணி நட்சத்திரங்கள் ஸ்ரேயாவோடு, ஷர்மன் ஜோஷி, ஷாம், பிரகாஷ் ராஜ் ஆகியோருடன் அறிமுக நடிகர்களான ஓசு பருவா மற்றும் கிரேசி கோஸ்வாமி ஆகியோர் முக்கிய வேடங்களில் நடித்துள்ளனர். இவர்களுடன் இசைப் பள்ளியின் மற்ற நடிகர்கள் பெஞ்சமின் கிலானி, சுஹாசினி முலே, மோனா அம்பேகன்கர், லீலா சாம்சன், பக்ஸ் பார்கவா, வினய் வர்மா, ஸ்ரீகாந்த் ஐயங்கார், வக்கார் ஷேக், ஃபானி ஆகியோருடன் மற்றும் பல குழந்தை நட்சத்திரங்களும் நடித்துள்ளனர்.
ஹைதராபாத்தைச் சேர்ந்த யாமினி பிலிம்ஸ் வழங்கும் இந்த படம் இந்தி மற்றும் தெலுங்கில் படமாக்கப்பட்டு, தமிழில் மொழிமாற்றம் செய்யப்பட்டு வெளியாகவுள்ளது.
