“பேப்பர் ராக்கெட்” வெற்றியைப் பற்றி இசையமைப்பாளர் சைமன் கே.கிங்*
கிருத்திகா உதயநிதி இயக்கியுள்ள ‘பேப்பர் ராக்கெட்’ வலைத் தொடருக்கு (Web Series) நல்ல வரவேற்பு கிடைத்துள்ளது.
இந்த தொடருக்கு, தனது பங்களிப்பால் மெருகூட்டியுள்ள இசையமைப்பாளர் சைமன் கே.கிங், தனது பாடல்கள் மற்றும் பின்னணி இசைக்காக ஊடகங்கள் மற்றும் பொதுமக்களிடமிருந்து பாராட்டுகளைப் பெற்றுள்ளார்.
அவரிடம் பேசினோம்… ”நான் இசையமைத்த ‘சத்யா’ படத்தின் ‘யவ்வனா’ என்ற சூப்பர் ஹிட் பாடல் வெளியான உடனேயே என்னை அணுகிய முதல் இயக்குனர் கிருத்திகா உதயநிதிதான். தனது அடுத்த படத்தில் என்னுடன் இணைந்து பணியாற்ற விரும்புவதாக அவர் கூறியது தான் இந்த அருமையான பயணத்தின் ஆரம்பம்.
பேப்பர் ராக்கெட் வெப் தொடருக்கு நல்ல வரவேற்பு கிடைத்துள்ளது மட்டுமல்லாமல் பரவலான பார்வையாளர்களையும் சென்றடைந்துள்ளது. ரம்யா நம்பீசன் பாடிய ‘சேரநாடு’ என்ற தமிழ் – மலையாள இருமொழிப் பாடலுக்கு ரசிகர்கள் மத்தியில் மிகப்பெரிய அங்கீகாரம் கிடைத்துள்ளதில் நான் மிகவும் மகிழ்ச்சியடைகிறேன். சமீப காலங்களில் வெளியாகும் திரைப்படங்களின் கதைகளில் முன்பு போல் பாடல்களுக்கு முக்கிய பங்கு இல்லை என்பதை நாம் பார்க்கிறோம். ஆனால், இயக்குனர் கிருத்திகா எப்போதுமே தனது கதைகளில் பாடல்களுக்கும் இசைக்கும் முக்கியத்துவம் கொடுப்பார். அதனாலேயே பேப்பர் ராக்கெட்டில் அற்புதமான பாடல்கள் இடம் பெற்றுள்ளன.
மிகவும் திறமையான இசையமைப்பாளர்களான தரன் மற்றும் வேத் ஷங்கர் ஆகியோருடன் பணிபுரிந்தது ஒரு சிறந்த அனுபவம். இந்த அனுபவத்தை ஏற்படுத்திக் கொடுத்த இயக்குனர் கிருத்திகாவுக்கு நன்றி.
‘கொலைகாரன்’, ‘கபடதாரி’ உள்ளிட்ட புயலான த்ரில்லர் படங்களுக்குப் பிறகு, ‘பேப்பர் ராக்கெட்’ ஒரு தென்றலாக வீசுவது ஒரு இனிமையான அனுபவம்” என்றார்.
சைமன் கே.கிங் அடுத்ததாக, வெற்றிகரமான இயக்குனர் இணையான புஷ்கர் – காயத்ரி தயாரிப்பில், அமேசான் ஒரிஜினலுக்காக ‘வதந்தி’ என்ற மர்ம திரில்லரை நமக்கு வழங்குவதற்காக, ‘கொலைகாரன்’ படத்தின் இயக்குனர் ஆண்ட்ரூ லூயிஸுடன் இணைந்துள்ளார்.
‘வதந்தி’ தொடரில் எஸ்.ஜே. சூர்யா, நாசர், லைலா, சஞ்சனா, விவேக் பிரசன்னா ஆகியோர் இந்த தொடரில் முக்கிய வேடங்களில் நடித்துள்ளனர்.
