‘விருமாண்டி’ அபிராமியின் ரீ என்ட்ரீ… நடிப்பைப் பார்த்து கண்கலங்கி எழுந்து நின்று கை தட்டிய ‘பாபா பிளாக்‌ ஷீப்’ படக்குழு!

நீண்ட இடைவெளிக்குப் பிறகு ‘விருமாண்டி’ அபிராமி நடித்துள்ள படம் ‘பாபா பிளாக்‌ ஷீப்.’ யூடியூப் மூலம் பிரபல ராஜ்மோகனின் அறிமுக இயக்கத்தில் பள்ளிக் குழந்தைகளின் மழலைத்தனம், விளையாட்டுத்தனம், சேட்டைகள், இன்ப துன்பம் என எல்லாவற்றின் கலவையாக உணர்ச்சிகரமான படைப்பாக இந்த படம் உருவாகிறது.

படத்தில் மிக முக்கிய வேடம் ஏற்றிருக்கும் அபிராமி உணர்ச்சிகரமான காட்சியொன்றில் படப்பிடிப்பில் பலரையும் கண்கலங்க வைக்கும் அளவுக்கு நடித்துள்ளார்.

இது குறித்து இயக்குநர் ராஜ்மோகன், ”இந்த படம் பள்ளிக் குழந்தைகளின் வாழ்வை சொல்லும் ஒரு அழகான டிராமா. கதையில் ஒரு குழந்தையை பிரசவம் முதல் பள்ளிக்கூடம் வரை சுமக்கும் அன்னை கதாபாத்திரம் இருந்தது. அதற்காக நடிகை அபிராமியை அணுகினேன். கதையை கேட்டவுடன் அவருக்கு மிகவும் பிடித்து, நான் நடிக்கிறேன் என்றார். படப்பிடிப்பில் ஒவ்வொரு காட்சியிலும் ஒரு அறிமுக நடிகை போல், என்னிடம் கருத்து கேட்டு, அவரது கதாபாத்திரத்தை அட்டகாசமாக திரையில் கொண்டு வந்துள்ளார். மிகவும் உணரச்சிகரமான ஒரு காட்சியில் அவரது நடிப்பை பார்த்து, மொத்த படக்குழுவும் கண்கலங்கி எழுந்து கை தட்டியது. அந்த காட்சியை ரசிகர்கள் திரையில் பார்க்கும் போது, கண்டிப்பாக அவர்களும் கண்கலங்குவார்கள்.

இது அபிராமிக்கு  மீண்டும் திரையில் ஒரு திருப்புமுனை படமாக இருக்கும். படத்தின் மொத்த படப்பிடிப்பையும் முடித்துவிட்டோம், படத்தில் மதுரை முத்து, விக்னேஷ்காந்த், சுப்பு பஞ்சு, சுரேஷ் சக்ரவர்த்தி, போஸ் வெங்கட் உள்ளிட்ட பல முன்னணி நடிகர்கள் அட்டாகாசப்படுத்தியுள்ளார்கள். படத்தின் இறுதிக்கட்ட வேலைகள் தற்போது நடந்து வருகிறது விரைவில் டீசரோடு சந்திக்கிறேன்” என்றார்.