அம்பிகா முக்கிய வேடத்தில் நடிக்கும் ‘எல்லாம் நன்மைக்கே’ என்ற படத்தில், சமீபத்தில் வெளியாகி பரபரப்பை ஏற்படுத்திய ஒன்வே’ என்ற திரைப்படத்தில் நடித்த தமிழ்பாண்டியன் கதையின் நாயகனாக நடிக்கிறார். மற்றொரு கதாநாயகனாக நடிக்க இளம் நடிகர் தேர்வு நடக்கிறது.
படத்தை ஜி குரூப் புரொடக்சன் சார்பில் தனசேகரன், கோழிக்கடை கோபால் சேர்ந்து தயாரிக்கின்றனர்.
முன்னணி இயக்குநர்கள் பலரிடம் பணிபுரிந்த ராஜா பரணிதரபிரபு, கதை, திரைக்கதை, வசனம் எழுதி தனது முதல் படமாக இயக்குகிறார். அவரிடம் படம் பற்றி கேட்டபோது, ”எல்லாம் நன்மைக்கே படத்தில் காதல், திரில்லர், காமெடி, குடும்பம், பாசம் உள்ளடக்கிய படமாக படமாக்குகிறேன். மக்களுக்கு பிடித்த கதை இது என்று அம்பிகா மேடம் பாராட்டியது எனக்கு விருதாக கருதுகிறேன்.
தம்பி ராமையா, அனுமோகன், கிரேன் மனோகர் ஆகியோரும் நடிக்கிறார்கள். அம்பிகாவின் மகளாகவும் கதாநாயகியாகவும் நடிக்க அம்பிகாவின் முகத்தோற்றத்தில் இருக்கும் கதாநாயகியை தேர்வு செய்ய உள்ளோம்.
இன்றைய வாழ்வியல் சூழ்நிலையில் அனைவருக்கும் தேவைகள் அதிகரித்து விட்டது. அப்படி தேவைப்படும் ஒன்றை வைத்து காமெடி, காதல், திரில்லர் கலந்து திரைக்கதை அமைத்து இப்படத்தை உருவாக்கி வருகிறேன்” என்றார்.
படப்பிடிப்பு கேரளாவில் உள்ள கொழிஞ்சாம் பாறையில் துவங்கி பொள்ளாச்சி, வால்பாறையில் வளர்ந்து சென்னையில் முடிவடைகிறது.
யானி ஆர். இசையமைக்க, ஜான் பாபு நடன பயிற்சியாளராக பணிபுரிகிறார்.
