மலையாளத் திரைப்படத் துறையிலும் ஊடக விளம்பரத் துறையிலும் 16 வருடங்கள் பணிபுரிந்த அனுபவம் மிக்கவர்; ‘நாய்கள் ஜாக்கிரதை’ படத்தில் உதவி இயக்குநராகப் பணிபுரிந்தவர் விமல் விஷ்ணு. அவர் இப்போது கருணாகரனை ஹீரோவாக வைத்து ‘குற்றச்சாட்டு’ என்ற படத்தை எமோஷனல் ஃபேமிலி டிராமா திரில்லராக, தனது முதல் படமாக இயக்கியுள்ளார்.
கதையின் நாயகன், குணச்சித்திர கதாபாத்திரம் மற்றும் நகைச்சுவை நடிகராகவும் வலம் வரக்கூடிய நடிகர் கருணாகரன் இந்தப் படத்தில் முன்னணி கதாபாத்திரத்தில் நடித்துள்ளார். பிரானா கதாநாயகியாக நடித்துள்ளார். பரத், தினேஷ் பிரபாகர், முன்னா சைமன், ரியாஸ் கான், குழந்தை நட்சத்திரம் ஷிவானி மற்றும் பல முன்னணி நடிகர்கள் நடித்துள்ளனர்.
படம் பற்றி இயக்குநர் விமல் விஷ்ணு பேசும்போது, “கொச்சியில் தமிழர்கள் பலர் வசித்து வருகின்றனர். அப்படி கொச்சியில் குடியேறிய அப்பா, அம்மா மற்றும் அவர்களின் அன்பு மகள் இவர்களை சுற்றி நடக்கும் கதைதான் ‘குற்றச்சாட்டு.’ அவர்களின் குழந்தை கொடூரமாக கொல்லப்பட்டு, குற்றவாளி நீதிமன்றத்தால் விடுவிக்கப்படும் போது, அப்பாவி தந்தை தனது மகளுக்கு நீதி கேட்க முயற்சி செய்கிறார். படம் ஆறு வெவ்வேறு அடுக்குகளுடன் நான் லீனியர் முறையில் எழுதப்பட்டுள்ளது. படப்பிடிப்பை முடித்துவிட்டோம். இதுவரை படத்தைப் பார்த்த அனைவரும் மகிழ்ச்சியடைந்துள்ளனர். இந்த படம் அனைத்து தரப்பு பார்வையாளர்களின் ஆர்வத்தையும் ஈர்க்கும் வகையில் எமோஷனல் மற்றும் த்ரில்லர் தருணங்களின் கலவையாக இருக்கும். பட வெளியீட்டுக்கான பணிகளில் ஈடுபட்டிருக்கிறோம்” என்றார்.
டிவைன் பிளாக்பஸ்டர் சார்பில் ராஜேஷ் மாதவன், சஜனி ராஜேஷ், தயன் ஷங்கர் ஆகியோர் தயாரித்துள்ளனர்.
படத்தின் இசை, டிரெய்லர் மற்றும் உலகம் முழுவதும் வெளியாகும் தேதி ஆகிய விவரங்கள் விரைவில் தெரியவரும்.
உருவாக்கத்தில் உறுதுணை:-
இசை – சுரேஷ் நந்தன்
ஒளிப்பதிவு – நிதின் சேகர் ஆர்.கே
எடிட்டிங் – பார்த்திபன்
டி ஐ – ஐஜீன்
கலரிஸ்ட் – சிவா
டப்பிங் – சூப்பர் குட் ஸ்டுடியோஸ்
மிக்சிங் & மாஸ்டரிங் – ஏஎஸ் லட்சுமி நாராயணன்
