‘நந்தன்’களுக்குத் தடையாக இருப்பது நந்தியல்ல சாதி.
இந்த, காலம் காலமாக தொடர்கிற சமூக அவலத்தை அஸ்திவாரமாக வைத்து ‘நாற்கரப் போர்’ என்கிற சதுரங்க விளையாட்டுப் பின்னணியில் உருவான படைப்பு.
துப்புரவுத் தொழிலாளர் சமூகத்தைச் சேர்ந்த ஏழைச் சிறுவன் நந்தன், தனது திறமையால் சதுரங்க விளையாட்டில் எப்படி கிராண்ட் மாஸ்டராக உயர்கிறான் என்பது கதை.
அந்த உயரத்தை எட்டுவதற்குள் அவன் சந்திக்கும் சாதிப் பாகுபாடு, ஏழை பணக்காரன் என்ற வேறுபாடு உள்ளிட்ட பல பிரச்சனைகளும், சவால்களும் திரைக்கதையின் ஒரு பகுதியாக இருக்க,
அவனது அம்மா ஆடுபுலி ஆட்டத்தில் வித்தை காட்டிக் கொண்டிருந்து பின்னர்
செஸ் பிளேயராக மாறிய சிங்கப் பெண் எபிசோடுகளை ஃபிளாஷ்பேக்கில் ஓடவிட்டு காட்சிகளை விறுவிறுப்பாக்கியிருக்கிறார் இயக்குநர் வெற்றிச் செழியன்.
‘சேத்துமான்’ படத்தில் கவனம் ஈர்த்த மாஸ்டர் அஸ்வின் இந்த படத்தில் கிராண்ட் மாஸ்டராக துடிக்கிற கதைநாயகன் நந்தன். ‘உங்காளுங்க உங்காளுங்கன்னு சொல்றாங்களே, அப்படினா என்ன மாஸ்டர்?’ என கேள்வி எழுப்புவதிலிருந்து ஏச்சுப் பேச்சுக்களால் ஏற்படும் வலியை உணர்த்துவது, வலி தருபவர்கள் மீது துணிச்சலான வார்த்தைகளை வீசுவது, பட்ட அவமானங்களை படிக்கட்டுக்களாக்கி முன்னேறுவது என அந்த சிறுவனிடமிருந்து கிடைத்திருக்கிறது எதார்த்த நடிப்பு.
ஏழை எளிய குடும்பத்துப் பெண்ணாக, துப்புரவுத் தொழிலாளியாக, சிறுவன் அஸ்வினுக்கு அம்மாவாக அபர்ணதி. சாதிவெறியர்களின் தாக்குதலிலிருந்து கணவனைக் காப்பாற்ற செஸ் பிளேயேராவது, மகனை தரம் தாழ்த்தி நடத்திய ஆசிரியரை எச்சரிப்பது என கொந்தளிப்பான காட்சிகள் ஏராளம். நடிப்பு பாராட்டுக்களைக் குவிப்பது நிச்சயம்.
‘ஏதோ தலைமுறையில மிதிச்ச சாணி, இவங்க அதை கழுவாம இருக்காங்க. அதுக்காக இன்னமும் அப்படித்தான் இருக்கணுமா? என உத்வேகமடைகிறவராக, சாதி வெறியர்களின் அராஜகத்திற்கு பலியாகி அடிபட்டு மிதிபட்டு ரத்தம் சிந்துகிறவராக அழுத்தமான பங்களிப்பை தந்திருக்கிறார் அபர்ணதியின் கணவனாக வருகிற லிங்கேஷ்.
‘விலை போகாத ஏழை இருக்கவே முடியாது’ என்றெல்லாம் கர்வமாகப் பேசி போதுமான அளவில் வில்லத்தனம் காட்டியிருக்கிறார் சுரேஷ் மேனன்.
விசித்திரன், தமிழரசி, அன்பு, மனோ மதுரை என இன்னபிறர் தங்கள் கடமையை சின்சியராக செய்திருக்கிறார்கள்.
‘அதிகாரமா கேள்வி கேட்டா பதில் திமிராத்தான் வரும்’, ‘நாங்க அள்ற மலம் வெளியில கிடக்கு; அள்ளவே முடியாத மலம் உங்க மண்டைக்குள்ள இருக்கு’, ‘விளையாட்டுங்கிறது ரெண்டு ஜாதிக்கிடையில நடக்கிற விஷயம் கிடையாது; ரெண்டு திறமைசாலிக்கு நடுவுல நடக்கிற விஷயம்’ என வசனங்களில் அனல் பறக்கிறது.
தினேஷ் ஆண்டனி இசையில் படத்தின் துவக்கத்தில் வருகிற ‘ஆரம்பத்தில் சாதியில்ல’ பாடலும், எட்டி வெச்சா எகிறி அடிpபோம்’ பாடலும் தெறிக்க விடுகிற ரகம். பின்னணி இசையில் குறையில்லை.
சென்னை சிந்தாதிரிப்பேட்டையின் குறுகலான தெருக்கள், சந்து பொந்துகள், குப்பை மேடுகள், சாக்கடைக் கால்வாய்கள் என அழுக்கடைந்த பகுதிகளை ராவாக பதிவு செய்து ரியாலிடிக்கு உதவியிருக்கும் அர்ஜுன் ரவியின் கேமரா, திண்டுக்கல் மாவட்ட சுற்று வட்டாரத்தில் பாயும்போது வெறொரு பரிமாணத்தை கொண்டு வருகிறது.
திறமையில் உயர்ந்து சாதியில் தாழ்ந்தவர்கள் சாதிக்க முயற்சித்தால்
நிலைமை என்னவாகும் என்பதை பல படங்களில் பார்த்தாயிற்று. ‘காலம் மாறிவிட்டதே, இன்னமும் ஏன் இப்படியெல்லாம் படம் எடுக்கிறீர்கள்?’ என்று கேட்டால், இயக்குநர்கள் ‘சமூகத்தில் அப்படியான நிலைமை முழுவதுமாக தீரும் வரை இப்படியான படங்களும் வந்து கொண்டேதான் இருக்கும்’ என்பார்கள். நம்மால் மறுபேச்சு பேச முடியாமல் போகும்.
தி கிராண்ட் மாஸ்டர் – சமூக அவலத்தின் லட்சத்துப் பத்தாவது சாட்சி!
-சு.கணேஷ்குமார் 
